Cueye la gaita gaiteru,
infla’l fuelle a reventar,
abre’l roncón y el punteru:
¡Rompe, gaiteru, a tocar!
Pon na llabor sentimientu,
dai juerza a los tos cantares,
a ver si llega’l to viento
al otru llau de los mares.
A allegrar a ises presones
que allá, por tierres llexanes,
sueñen con oyer los sones,
melgueros, de les quintanes.
Con escuchar cómo berra
el carru po les veredes
cuando güelve de la tierra
co la quexumbre nes ruedes.
A isos que llexos del llar
de la so patria astoriana
piensen en oyer cantar
una tonada aldeana.
En pisar por istos praos,
en trepar por istos montes,
en llindar istos ganaos
y beber en istes fontes.
Son los que’n noche de lluna,
con fachenda y bones traces,
diben rondar, una a una,
les puertes de les rapaces.
Onde alcontraron la moza
que hoy, con ellos a la par,
sufre munchu más que goza
a juerza de ricordar.
Pensando que de neñina,
por xugar co los chavales,
dexó la só moñequina
tirada ente los bardiales.
De cuando al so mozu Quicu,
cuando diba a corteyala,
tuvu que dai en focicu
por tratar de masuñala.
¡Cuánta ñostalxia y pesar!,
mermuren Quicu y María:
¿de qué nos val aforrar
si nos falta l’allegría?.
Si tamos allexadinos
de deudos y compañeros;
tristes como paxarinos
cuando yos quiten los ñeros.
Y ye que sin ñeru tamos,
que nos lo llevó’l degorru
tan pronto como dexamos
atrás les teyes del horru.
Cuando ya, pal nuestru mal,
dimos el adiós postreru,
na quintana a la figal
y al gallu nel gallineru.
¡Probe xente! cuántes ganes
tienen de que güelva’l día
de rucar unes ablanes
nel prau de la romería.
Por isu, amigu gaiteru,
mientres en tanto y en non
lo llogren, dai al punteru
y fai sonar al roncón.
Pon juerza y pon sentimientu,
pon brío nos tos soplares,
pa ver si llega’l to viento
al otru llau de los mares.
A alliviar les sos tristeces,
a menguar el so pesar,
llevándoyos les tenreces
arteres del to cantar.
No hay comentarios:
Publicar un comentario